रत्ननगर, १३ जेठ ।
नेपाली कांग्रेस रत्ननगर नगर सदस्य टीका कुमारी नेपालको निधन भएको छ । उनको शुक्रबार रत्ननगर नगरपालिका वडा नम्बर १४, डुम्री चोक स्थित आफ्नै निवासमा निधन भएको हो । ६६ वर्षीया नेपाल क्यान्सर रोगले ग्रस्त थिइन् ।
कांग्रेस रत्ननगरका सभापति समेत रहेका रत्ननगर नगरपालिका प्रमुख प्रह्लाद सापकोटाले उनको पार्थिव शरीरमा नेपाली कांग्रेसको झण्डा ओढाएर अन्तिम श्रद्धाञ्जली दिएका थिए । पार्टीमा निरन्तर योगदान गरेकी नेपालको निधनले पार्टीलाई अपूरणीय क्षति पुगेको नगर प्रमुख सापकोटाले बताए । नगर समितिले नेपालको निवासमै शोक सभा गरेको थियो । नेपालको आजै देवघाटमा वैदिक परम्परा अनुसार अन्त्येष्टि गरिएको छ । नेपालका एक छोरी र दुई छोरा छन् ।
नेपाल विभिन्न सामाजिक संघसंस्थामा सक्रिय रहँदै आएकी थिइन् । लामो समय महिला स्वास्थ्य स्वयंसेविका रहेर सेवा गरेकी उनी पञ्चायती व्यवस्था विरुद्धको आन्दोलनमा पनि स्वर्गीय पति कृष्ण बहादुर नेपालसँगै सक्रिय थिइन् । त्यसताका नेपाली कांग्रेसको संगठन विस्तारका लागि उनैको निवासमा पार्टीका गोप्य बैठकहरू राखिने गर्दथे ।
