लिग २ अन्तर्गतको खेलमा ओमान विरुद्व उत्रनुभन्दा दश दिन अघि नेपाली राष्ट्रिय टोली अमेरिका आएर प्रशिक्षण थालेको हो । पहिलो पटक अमेरिका भ्रमणमा रहेको नेपाली राष्ट्रिय टोलीलाई आइसिसीले तोकेको समय भन्दा पहिलानै यहाँ ल्याई प्रशिक्षणको प्रबन्धका लागि अमेरिकामा रहेको नेपाली क्रिकेट क्लब नेपाली अल स्टारले पहलकदमी लिएको हो । यस कार्यमा गैरआवासीय नेपाली संघ, राष्ट्रिय समन्वय परिषद्ले महत्त्वपूर्ण योगदान गरेको क्लबका सदस्य सञ्जय शर्माले जानकारी दिनुभयो ।

नेपालको छवि अन्तर्राष्ट्रिय जगतमा चिनाउनको लागि महत्त्वपूर्ण भूमिका खेल्ने खेलाडीहरूलाई स्वागत गर्न पाउनुलाई आफूहरूले सकारात्मक रूपमा लिएको क्लबका अर्का सदस्य आशिक लामाले बताए ।

गैरआवासीय नेपाली संघ, राष्ट्रिय समन्वय परिषद्, अमेरिकाका सचिव अनुप खनालले सहयोगी सबैको साथ र सहयोगले एनआरएनए अमेरिकामा यस कार्यमा जोडिएर यसलाई सफल पार्ने दिशामा अघि बढेको बताए ।

गैरआवासीय नेपाली संघ, राष्ट्रिय समन्वय परिषद् अमेरिकाले यस कार्यलाई विशेष महत्त्व दिएको बताउँदै उपाध्यक्ष सुमन थापाले जतिसक्दो बढी सहयोग सङ्कलन गरी राष्ट्रका हिरोहरूलाई सहयोग गर्ने संघको चाहना रहेको जानकारी दिए ।

संघका अध्यक्ष बुद्धिसागर सुवेदीले नेपाललाई अन्तर्राष्ट्रिय जगत्मा चिनाउने खेलाडीहरूलाई संघले स्वागत गर्न पाउनु र उहाँहरूसँगको सहकार्यलाई विशेष रूपमा लिएको बताउँदै आगामी दिनमा पनि यस्ता कार्यमा संघ सदैव तत्पर रहने बताए ।

नेपालले यहाँ रहँदा अमेरिकासँग दुई र ओमानसँग दुई खेल खेल्नेछ । नेपालको पहिलो खेल जुन ९ मा ओमान विरुद्ध हुनेछ । त्यसैगरी जुन ११ मा अमेरिका, जुन १४ मा ओमान र जुन १५ मा फेरि अमेरिकासँग नेपालले खेल्ने तालिका रहेको छ ।

लिग २ अन्तर्गत अंक तालिकामा ३२ खेल खेलेको ओमानले १९ खेलमा जित निकाल्दै ४० अंक बटुलेको छ । ऊ अंकतालिकाको शीर्ष स्थानमा छ । यसैगरी स्कटल्याण्डले १६ खेलमा ११ जित निकाल्दै २४ अंक ल्याएको छ । ऊ दोस्रो स्थानमा रहेको छ । यस्तै, युएईले १८ खेल खेल्दा १० मा जित निकालेको छ । ऊ २२ अंकका साथ तेस्रो स्थानमा छ । चौथो स्थानको नामिबियाको १४ अंक छ भने पाँचौँ स्थानको अमेरिकाले पनि १४ अंक जोडेको छ । नेपालले भने १२ खेल खेल्दा ६ मा मात्रै जित निकालेको छ । छैँटौँ स्थानको नेपालको १२ अंक छ भने पुछारको पपुवा न्यूगिनीले जम्मा २० खेलबाट जम्मा २ अंक पाएको छ ।

नेपालको टोलीमा सन्दीप लामिछाने (कप्तान), आसिफ शेख (विकेटकिपर), कुशल भुर्तेल, रोहित पौडेल, दीपेन्द्रसिंह ऐरी, आरिफ शेख, विनोद भण्डारी (विकेटकिपर), सुनिल धमला, देव खनाल, आदिल अन्सारी, करण केसी, सोमपाल कामी, सुशान भारी, किशोर महतो र सागर ढकाल रहेका छन् ।