चितवन, ६ असोज ।
नारायणगढको साईराम डेण्टल केयरले डिजिटल स्क्यानरको थालनी गरेको छ । नेपालमा भर्खरै भित्रिएको यो प्रविधि काठमाडौं उपत्यका बाहिर पहिलो पटक साईरामले प्रयोगमा ल्याएको हो । वरिष्ठ दन्तरोग विशेषज्ञ डा. अजय न्यौपानेका अनुसार डेण्टल स्क्यानरको माध्यमबाट मुखभित्रको सम्पूर्ण अवस्थाको जानकारी कम्प्युटरको स्क्रिनमा थ्रिडी तस्वीरमा हेर्न सकिन्छ ।
उनका अनुसार विगतमा बिरामीको दाँतसम्बन्धी क्राउन, ब्रिज, दाँत राख्ने लगायत जुनसुकै काम गर्नु परेमा हातैले नापो लिनुपर्थ्यो । नापो अनुसार प्रयोगशालामा पठाउनु पर्थ्यो । प्रयोगशालाबाट बनेर आएपछि पनि कहिलेकाहीँ नमिल्ने जस्ता समस्या हुने भएकाले काम गर्न धेरै झन्झटिलो र गाह्रो हुने गरेको डा. न्यौपानेले अनुभव सुनाए ।
“डिजिटल डेण्टल स्क्यानरको सहायताले बिरामीलाई एउटै कुर्चीमा राखेर दाँत र मुखको सम्पूर्ण स्क्यान गर्न मिल्छ”, उनले भने । यो प्रविधिबाट उपचार गर्दा समयको बचतका साथै बिरामी र चिकित्सकलाई सहज हुने उनले बताए । “दाँत किराले खाएको छ कि छैन ? गिँजामा के समस्या छ ? मुखमा घाउखटिरा छ कि ? मुखमा क्यान्सर हुने अवस्था छ कि छैन ? भन्ने कुरा कम्प्युटरको स्क्रिनमा हेरेपछि थाहा पाउन सकिन्छ”, उनले भने ।
विगतमा दाँतको नापो लिएर प्रयोगशालामा पठाउनु पर्ने हुँदा एक दुई दिन समय कुर्नु पर्ने भए पनि अब लामो समय कुर्नु नपर्ने डा. न्यौपानेले जानकारी दिए । “ईमेलमार्फत् प्रयोगशालामा पठाइएको स्क्यान विवरणका आधारमा तत्कालै क्राउन, ब्रिज, दाँत तयार हुन्छ । छोटो समय हुने बिरामीहरूलाई धेरै समय कुर्नु नपर्ने भयो”, उनले भने ।
२१औँ शताब्दीमा डिजिटल दन्तचिकित्सा प्रविधि अनिवार्य भइसकेको डा. न्यौपानेले अनुभव सुनाए । “बिरामीलाई सहज र सरल तरिकाले सेवा दिन यो प्रविधि अति नै उपयोगी छ”, उनले सुनाए ।
डेण्डल केयरका सञ्चालक डा. सरु थापा न्यौपानेले अमेरिका तथा युरोपका देशहरूमा हाल सोही प्रविधिको प्रयोग भइरहेको बताइन् । उनले साईराम डेण्टल केयरले बिरामीलाई कसरी सहज उपचार सेवा दिन सकिन्छ भनेर सधैं अत्याधुनिक प्रविधि भित्र्याउँदै आएको बताइन् । उनी भन्छिन्, “हामीले दन्त उपचारको क्षेत्रमा विकास भएका नयाँनयाँ प्रविधि र उपकरण भित्र्याएर बिरामीलाई सेवा दिँदै आएका छौं ।”
