भरतपुर, २७ असोज ।
चितवन जिल्लामा पछिल्लो चौबिस घण्टामा १९ जनामा डेंगीको संक्रमण पुष्टि भएको छ । स्वास्थ्य कार्यालय चितवनले बिहीबार साँझ सार्वजनिक गरेको अद्यावधिक विवरणका अनुसार १५ जना चितवनका हुन् भने अरु ४ जना अन्य जिल्लाका हुन् । कार्यालयका अनुसार पछिल्लो २४ घण्टामा भरतपुर महानगरपालिकाका १२ जनामा डेंगी पुष्टि भएको छ । दुई जना खैरहनी नगरपालिका रहेका छन् भने अर्का एक संक्रमित राप्ती नगरपालिकाका हुन् ।
जिल्लामा साउन १ गतेयता गरिएका ६ हजार २५४ परीक्षणमा १ हजार ३३८ जनामा डेंगी पुष्टि भएको छ । तीमध्ये ६०५ जना भरतपुरका हुन् । यस्तै १३१ जना रत्ननगर न.पा., ४४ जना राप्ती न.पा., २५ जना कालिका न.पा., ७६ जना खैरहनी न.पा.का हुन् । माडी नगरपालिकामा हालसम्म १९ जनामा संक्रमण देखिएको छ भने इच्छाकामना गाउँपालिकामा सो संख्या ५ रहेको छ । हालसम्म संक्रमण पुष्टि भएकामध्ये २७८ अन्य जिल्लाका हुन् भने १५५ जनाको ठेगाना नखुलेको कार्यालयले जनाएको छ ।
हालसम्म डेंगीका कारण चितवनमा दुई जनाको मृत्यु भएको स्वास्थ्य कार्यालयको तथ्याङ्कमा उल्लेख छ ।
