त्यसपछि ओलीले अरस्तुको एउटा कथा सुनाए । जसको सार थियो, विद्वानले घमण्ड गर्न हुँदैन । यो संसार ज्ञानको भण्डार हो, हामीले सिकेको कुरा त त्यसको सानो अंश मात्र हो ।

त्यसपछि ओलीले पीएचडी गरेका तिनै व्यक्तिको कुरा जोडे । ‘उनले लुकेर भिडियो खिचेछन्, अरु सबै कुरा कटाए । पीएचडी गर्दैमा सबै कुरा जानिन्छ भन्ने कुरा होइन, त्यहीँ चाहिँ राखेर …’ ओलीले सम्पादित भिडियो मात्र सार्वजनिक गरिएको बताए ।

ओलीले भने, ‘मैले विचार गरेँ, ती चाहिँ खास विद्वान भइसकेका रहेछन्, मलाइ थाहा भएन । मैले त भरसक राम्रै बनाउन खोजेको हो, तर उनी त बनिसकेका रहेछन् । बनिसकेको घरमाथि इँटा थपेजस्तो भएछ । छतमा इँटा राखेजस्तो । जगमा राख्नुपर्ने छतमा राखेजस्तो भएछ, भाइरल ।’

ओलीले अगाडि भने, ‘मलाई आरोप आयो, आफू बज्रस्वाँठ छ, पढेलेखेको छैन, अनि पढेलेको मान्छे आयो भने पीएचडी गर्दैमा सबै जानिन्छ भनेर होच्याउँछ, भन्छन्, मैले कहाँ होच्याएँ ?’

अन्तिममा उनले थपे, ‘कोही पनि मान्छे ठूलो हुँदैन । उमेरले ठूलो होला, पद, ओहोदामा ठूलो होला, मान्छेका रुपमा ठूलो र सानो हुँदैन ।’