हेटौंडा ।
बागमती प्रदेशमा दोस्रो कार्यकालको पहिलो अधिवेशन सोमबारदेखि सुरु भएको छ । पहिलो बैठकले सभामुख र उपसभामुखको निर्वाचन मिति तय गरेको छ । २८ पुसमा सभामुख र २९ पुसमा उपसभामुखको निर्वाचन २९ पुसमा तोकिएको छ ।
तर सत्तारुढ दलहरुबीच मुख्यमन्त्री, सभामुख लगायतका पदको बाँडफाँट भइसकेको छैन ।
प्रदेश सरकारको नेतृत्वमा नेकपा एमाले, माओवादी केन्द्र र राप्रपाले दाबी गरेका छन् ।
११० प्रदेशसभा सदस्य रहेको बागमती प्रदेशमा सरकार गठनका लागि ५६ को समर्थन चाहिन्छ । एमालेसँग २७, माओवादी केन्द्रसँग २१ र राप्रपा १३ प्रदेशसभा सदस्य छन् र तीन वटै दलले संसदीय दलको नेता चयन गरिसकेका छन् ।
एमाले संसदीय दलका नेता जगन्नाथ थपलिया, माओवादीका शालिकराम जमकट्टेल र राप्रपाका उद्धव थापा मुख्यमन्त्रीको दौडमा छन् ।
३७ सिटसहित नेपाली कांग्रेस पहिलो दल हो । तर सत्ता समिकरणका कारण कांग्रेस प्रतिपक्षमा पुगेको छ ।
२७ प्रदेशसभा सदस्य भएको एमाले दोस्रो ठूलो दल हो । त्यसैले मुख्यमन्त्रीमा आफ्नो दाबी स्वभाविक भएको एमाले संसदीय दलका नेता थपलिया बताउँछन् । उनले अघि भने, ‘सरकार गठनका लागि यहाँबाट गर्नुपर्ने प्रयास गरिरहेका छौं । सहमतिमै बागमती प्रदेशमा एमालेकै नेतृत्वमा सरकार बन्छ ।’
माओवादी केन्द्रका संसदीय दलका नेता जमकट्टेल भने सरकार निर्माणमा आफ्नो पार्टीको महत्वपूर्ण भूमिका हुने भएकाले आफ्नै नेतृत्वमा सरकार गठन बन्ने दाबी गर्छन् ।
उनले भने, ‘आन्तरिक मामिला र आर्र्थिक मामिलामन्त्री भएर काम गरिसकेको छु । सरकार सञ्चालनको अनुभव र केही नयाँ राम्रो काम गरौं भन्नका निमित्त म यसपटक मुख्यमन्त्री बन्न चाहन्छु ।’
विगतमा प्रदेश सरकारको नेतृत्वमा एमालेलाई सघाएकाले पनि यो पटक आफूहरुलाई छाड्नुपर्ने उनको तर्क छ ।
एमाले र माओवादी मिलेर मात्र बागमतीमा सरकार बन्दैन, बहुमतका लागि राप्रपाको समर्थन अनिवार्य जस्तै भएको छ । त्यसैले राप्रपाले अरु प्रदेशमा समर्थन गर्ने गरी बागमतीमा सरकारको नेतृत्व आफ्नो दलले पाउनुपर्ने दाबी गरेको छ ।
‘सातवटा प्रदेशमध्ये चार वटामा हामीले समर्थन नगर्ने हो भने सरकार बन्दैन । त्यसमध्ये हाम्रो दाबी बागमतीमा मात्र हो,’ राप्रपा बागमती प्रदेशका संसदीय दलका नेता उद्धव थापा भन्छन्, ‘केन्द्रीय सरकार कसरी बन्यो बिर्सने र हामी मात्र हौं भन्न थाल्नुभयो भने त कुरा मिल्ला र ?’
दलहरुको आ–आफ्नो दाबी भए पनि मुख्यमन्त्री को भन्ने चाहिँ केन्द्रमा बन्ने सहमतिमा निर्भर हुने तीनै आकांक्षी बताउँछन् । ‘समीकरण निर्माण केन्द्रबाट भएकाले केन्द्रको निर्णयलाई कुरेका छौं,’ एमाले संसदीय दलका नेता थपलियाले अनलाइनखबरसँग भने्, ‘पुस महिनाभित्र बागमती प्रदेशले नयाँ सरकार पाउनेछ ।’
