फागुन १९, काठमाण्डाै
राष्ट्रिय सभाका अध्यक्ष गणेशप्रसाद तिमिल्सिनाले देशमा विद्यमान भ्रष्टाचार अन्त्यका लागि राजनीतिक दलहरूबीच राष्ट्रिय सहमति आवश्यक रहेको बताउनुभएको छ । संसदमा प्रतिनिधित्व गर्ने राजनीतिक दलहरू र राज्यको माथिल्लो निकायमा रहेका प्रमुखहरूले भ्रष्टाचारीलाई कारबाही गर्ने गरी सहमति गर्नुपर्ने पनि उहाँले स्पष्ट पार्नुभयो ।
भ्रष्टाचारविरुद्ध सांसदहरूको विश्वव्यापी सङ्गठन ‘नेपाल च्याप्टर’ ले शुक्रवार काठमाण्डाैमा आयोजना गरेको एक कार्यक्रममा बोल्दै अध्यक्ष तिमिल्सिनाले २०४६ सालयताका भ्रष्टाचारलाई छानबिन गरी कारबाही गर्न दलहरू तयार हुनुपर्ने बताउनुभयो । राजनीतिक दलहरूले देशमा सुशासन ल्याउन राष्ट्रिय सहमति नै गरेर अघि बढ्नुपर्ने उहाँले बताउनुभयाे । भ्रष्टहरूलाई जेलमा पठाउनका लागि पनि राजनीतिक नेतृत्व प्रतिबद्ध हुन सकेको खण्डमा देशमा भ्रष्टाचार नियन्त्रण हुने उहाँकाे भनाइ थियो ।
अध्यक्ष तिमिल्सिनाले भन्नुभयो, ‘भ्रष्टाचारलाई निमिट्यान्न पार्नका लागि एउटा एउटा राष्ट्रिय सहमति आवश्यक छ । संसदमा प्रतिनिधित्व गर्ने सबै राजनीतिक दलका प्रमुखहरू, पदाधिकारीहरू, राज्यको माथिल्लो निकायमा रहने प्रमुख तथा पदाधिकारीहरूबीच एउटा राष्ट्रिय सहमति गरौँ न । त्यो सहमति भनेको भ्रष्टाचार नियन्त्रण गर्ने । भ्रष्टाचारीलाई कारबाही गर्ने । बहुदल आएयताका भ्रष्टाचारमा छानबिन हाेस् । चाहे त्यो विमान खरिदमा होस्, नियुक्ति गर्दा होस्, जग्गाका कुरा होलान् । ती सबैलाई एक ठाउँमा राखेर त्यसमा स्वतन्त्र छानबिन गरौँ । म, हामी जो परे पनि जेल जानेसम्मको कारबाही गर्न सकिन्छ भन्न सकिन्छ ।’
अध्यक्ष तिमिल्सिनाले भ्रष्टाचार नियन्त्रणका लागि अख्तियार दुरुपयोग अनुसन्धान आयोगजस्ता निकायहरूलाई सशक्त बनाउनुपर्नेमा पनि जोड दिनुभयो ।
