म्याग्दीको प्रसिद्ध पर्यटकीयस्थल पुनहिलबाट देखिएको सूर्योदयको दृश्य र दृश्यावलोकन गर्दै आन्तरिक पर्यटक ।
काठमाण्डाै – नयाँ वर्ष २०८० को अवसरमा देशभरका सबैजसो पर्यटकीय स्थलमा आन्तरिक पर्यटकको घुइँचाे लागेको छ । नयाँ वर्षलगत्तै शनिवार परेकाले कतिपय ठाउँमा आज पनि पर्यटकको घुइँचाे छ ।
काठमाण्डौ उपत्यका भित्र र वरपरका ठाउँसँगै देशभरका पर्यटकीय स्थलहरुमा घुम्न जाने आन्तरिक पर्यटकको सङ्ख्या उल्लेखनीय रहेको छ । काठमाण्डौ उपत्यकाभित्रका स्वयम्भू, पशुपति, गोदावरी, बालाजु बाइसधारा, चम्पादेवी, चन्द्रागिरि, शिवपुरी, फूलचोकी, घ्याम्पेडाँडा, त्रिभुवन पार्क लगायतका ठाउँमा हिजो दिनभर नै घुम्न जानेहरुको चहलपहल थियो ।
मुख्य पर्यटकीय क्षेत्र पोखरा, भक्तपुरको नगरकोट, काभ्रेको धुलिखेल, चितवनको सौराहा लगायत ठाउँमा अस्ति शुक्रवारदेखि नै चहलपहल बढेको छ । कतिपय ठाउँमा नयाँ वर्षको अवसर पारेर मेला महोत्सव पनि गरिएको छ ।
सुदूरपश्चिममा नयाँ वर्षको पहिलो दिनलाई बिसु पर्वका रूपमा मनाउने गरिन्छ । बिसु पर्व मनाउनको लागि टाढा टाढाबाटसमेत परिवारका सदस्य र आफन्त घरमा जम्मा भएका छन् ।
