सीमावर्ती भारत उत्तरप्रदेश राज्यको बहराइच जिल्लामा हुन लागेको नगरपालिका र नगर पञ्चायतको निर्वाचनलाई मध्यनजर राख्दै नेपाल भारतसँग जोडिएको सीमा बन्द गरिने भएको छ ।
मंगलबार राति १० बजेदेखि बिहीबार राति बजेसम्म सीमा बन्द हुने बर्दियाका प्रमुख जिल्ला अधिकारी नारायणप्रसाद रिसालले बताए ।
बहराइचमा मतदान बिहीबार हुने भएकोले बाँके र बर्दियाको सीमा बन्द हुने छ । सोमबार भारतको नानपारास्थित एसएबीको ४२ औं बटालियनमा बसेको दुवै मुलुकका सुरक्षा अधिकारीबीच भएको बैठकमा उक्त निर्णय गरिएको हो ।
सीमा बन्द भएपछि यातायात, व्यापारिक कारोवार बन्द हुने छ । साथै मानिसहरुको आउजाउ समेतमा रोक लगाइने भएको प्रजिअ रिसालले जनाए । गम्भीर खालका बिरामी उपचारका लागि एम्बुलेन्सबाट आउजाउ गर्दा रोक नलगाइने भएको छ ।
बाँके, बर्दिया भारतको बहराइच र श्रावास्ती जिल्लाका सुरक्षा अधिकारी, वन, राष्ट्रिय अनुसन्धानका अधिकारी लगायतको उपस्थिति थियो । बैठकमा बहराइचका डिएम डाक्टर दिनेश चन्दले निर्वाचन शान्तिपूर्ण रुपमा गर्न दुवै मुलकको सहकार्यले सहयोग मिल्ने प्रजिअ रिसालले उद्दढ गर्दे बताए ।
बैठकमा सीमामा हुने तस्करी, जाली नोट लगायत अवाञ्चित गतिविधि रोक्न दुवै मुलुकका अधिकारी चनाखो भइ सहकार्य गर्न सहमति जनाएका थिए ।
