४ चैत, पोखरा । गण्डकी प्रदेशसभा सदस्य दीपक मनाङेले एकीकृत समाजवादी त्यागेको घोषणा गरेका छन् । छ । स्वतन्त्र हैसियतमा चुनाव जितेकाले स्वतन्त्र नै रहने भन्दै एकीकृत समाजवादी पार्टी परित्याग गरेको भन्दै गण्डकी प्रदेशसभा सचिवालयमा पत्र दिएको सचिवालयका सचिव हरिराज पोखरेलले बताए । गण्डकीमा सरकार बनाउने कसरत भइरहँदा मनाङेको पार्टी परित्यागको घोषणाले गण्डकीमा तरङ्ग ल्याएको छ । सत्ता समीकरणको सन्दर्भमा मनाङेको घोषणाले चर्चा पाएको हो ।
२०७९ मंसिर ४ मा भएको निर्वाचनमा उनी मनाङबाट स्वतन्त्र उमेदवारका रुपमा निर्वाचित भएका हुन् । निर्वाचित भएको त्यसको १५ दिनपछि एकीकृत समाजवादीमा प्रवेश गरेका थिए । प्रदेशसभा सदस्य मनाङेले गण्डकीमा अप्ठेरो अवस्था देखिएकाले मध्यावधि चुनावमा जान सक्ने अवस्था रोक्न आफूले स्वतन्त्र रहने निर्णय गरेको बताएका छन् ।
६० सदस्यीय गण्डकी प्रदेश सभामा कांग्रेसको २७, एमालेको २२, माओवादी केन्द्रको सभामुखसहित ८, राप्रपाको २ र दीपक मनाङे छन् । यो स्थितिमा मुख्यमन्त्रीले विश्वासको मत पाउने अवस्था छैन भने एमाले(माओवादीले पनि सरकार बनाउन सक्ने अवस्था छैन ।
गण्डकीमा अहिलेसम्म राप्रपा निर्णायक देखिएको छ । तर, मनाङे पनि स्वतन्त्र बस्दा अहिलेको सत्ता समीकरणको सजिलै सरकार बन्ने स्थिति नदेखिएको हो ।
