बाल्टिमोर । गैर आवासीय नेपाली संघ अमेरिका र गैर आवासीय नेपाली संघ राष्ट्रिय समन्वय परिषद् अमेरिकाबीच एकता हुने भएको छ। गैर आवासीय नेपाली सङ्घ राष्ट्रिय समन्वय परिषद् अमेरिका टेनेसीमा दर्ता भएको गैर आवासीय नेपाली संघ स्थापनाकालदेखि नै सञ्चालनमा छ । गैरआवासीय नेपाली संघ अमेरिका २०२३ देखि सञ्चालनमा छ । यी दुवै संस्थालाई एक गराउने तयारी अन्तिम चरणमा छ । अमेरिका पुगेका गैर आवासीय नेपाली संघ अन्तर्राष्ट्रिय समन्वय परिषद् (एनआरएनए आइसीसी ) का नवनिर्वाचित अध्यक्ष महेश कुमार श्रेष्ठको पहलमा एकता गराउन खोजिएको हो । गैर आवासीय नेपाली संघ अन्तर्राष्ट्रिय समन्वय परिषद् (एनआरएनए आइसीसी ) का उपाध्यक्ष एवं एनसिसि अमेरिकाका निवर्तमान अध्यक्ष बुद्धिसागर सुवेदीले एकताले गैर आवासिय नेपालीमा सदभाव र भाईचाराको सम्बन्ध प्रगाढ हुने बताए । उनले सहमति गर्ने दुवै अध्यक्षलाई धन्यवाद दिए । सहमतिको लागि सुवेदीले सुरुवातमै प्रस्ताव गरेका थिए ।
एकताको लागि दुई संस्थाका अध्यक्षहरू डाक्टर अर्जुन बन्जाडे र सूर्य लम्सालले सहमतिपत्रमा हस्ताक्षर गरेका छन् । सहमति अनुसार डा. अर्जुन बन्जाडेले नेतृत्व गरेको एनआरएनए एनसीसी अमेरिकाले संघका केन्द्रीय अध्यक्ष श्रेष्ठको स्वागत गर्न न्यूयोर्कमा आयोजना गरेको कार्यक्रममा सूर्य लम्साल पुगेका थिए । त्यस्तै सूर्य लम्साल नेतृत्वको एनआरएनए अमेरिकाले सङ्घका अध्यक्ष महेश श्रेष्ठलाई स्वागत गर्न शनिबार न्यूयोर्कमा हुन गइरहेको कार्यक्रममा पनि डाक्टर अर्जुन बन्जाडे पुगेका थिए । शुक्रबार बाल्टिमोरमा आयोजित कार्यक्रमलाई सम्बोधन गर्दै केन्द्रीय अध्यक्ष श्रेष्ठले एनआरएनए विवादका कारण संस्थाप्रति नै नकारात्मक धारणा बनेको बताए । उनले काठमाडौँमा गत महिना सम्पन्न एकता महाधिवेशनको मर्म बमोजिम संस्थालाई एकजुट बनाउन आफुले सक्दो पहल गरिरहेको पनि जनाए।
२०२२ मार्चमा काठमाडौँमा छुट्टाछुट्टै एनआरएनएका दशौँ महाधिवेशन आयोजना गरिए पछि अमेरिकामा पनि एनआरएनएका छुट्टाछुट्टै कमिटिहरु गठन भएका थिए। अमेरिकाका दुवै कमिटीहरुबीच एकता प्रक्रिया बढाउन भएको सहमतिले संसारभरि नै एउटा सकारात्मक संदेश गएको एनआरएन अभियन्ताहरुले बताएका छन् ।
