चितवन, २१ जेठ ।
जिल्ला समन्वय समिति, चितवनको संयोजक पदमा पाँच दलीय गठबन्धनको तर्फबाट कांग्रेस चितवनका पुराना नेता पूर्ण बहादुर रानाभाटलाई उम्मेद्वार बनाउन कांग्रेस चितवनले प्रदेश समितिमा एकल नाम सिफारिस गरेको छ । जिल्लास्थित गठबन्धनका दलको शनिबार बसेको बैठकले सर्वसम्मत उमेदवार तय गरेको हो ।
समितिको संयोजक चयन गर्न निर्वाचन गर्नुपर्ने व्यवस्था छ । उक्त निर्वाचनमा चितवनका सात स्थानीय तहका प्रमुख तथा उपप्रमुख गरी १४ जना जनप्रतिनिधिले मात्रै मतदान गर्न पाउनेछन् ।
हालै सम्पन्न स्थानीय तह निर्वाचनमा पाँच दलीय गठबन्धनले भरतपुर महानगरपालिका र राप्ती नगरपालिकामा प्रमुख र उपप्रमुख दुवै पद जितेको छ । रत्ननगर र खैरहनी नगरपालिकामा भने प्रमुख पदमा मात्रै गठबन्धनका विजयी भएको थियो । माडी नगरपालिकामा गठबन्धनले उपप्रमुख जित्दा एमालेका उम्मेद्वार प्रमुख पदमा निर्वाचित भएका थिए । त्यसबाहेक एमालेले कालिका नगरपालिकामा प्रमुख र उपप्रमुख, इच्छाकामना गाउँपालिकामा अध्यक्ष र उपाध्यक्ष, खैरहनी नगरपालिकामा उपप्रमुख र रत्ननगर नगरपालिकामा पनि उपप्रमुख पद जितेको हो ।
