भरतपुर, २० कात्तिक ।
श्रीलंकाली क्रिकेटर दनुश्का गुनतिलकालाई यौन दुर्व्यवहारको आरोप लागेपछि प्रहरीले पक्राउ गरेको छ । २९ वर्षीया युवतीले यसै साता यौन दुर्व्यवहारको आरोप लगाएपछि प्रहरीले उनलाई आइतबार बिहानै अष्ट्रेलियाको पूर्वी क्षेत्रस्थित एक होटलबाट पक्राउ गरेको हो ।
अष्ट्रेलियाको न्यु साउथ वेल्सस्थित प्रहरीका अनुसार ती युवतीले ब्याट्सम्यान गुनतिलकालाई केही दिनअघि अनलाइन डेटिङ एप्समार्फत् सम्पर्क गरी भेटेकी थिइन् । त्यसपछि नोभेम्बर २ बुधबार साँझ ती युवतीले आफूलाई गुनतिलकाले यौन दुर्व्यवहार गरेको आरोप लगाएकी हुन् । प्रहरीले यस घटनाबारे अनुसन्धान गरिरहेको जनाएको छ । जस अन्तर्गत शनिबार प्रहरीले क्रिकेटर टोली रहेको स्थान रोज बेमा पुगेर घटनास्थलको अनुसन्धान गरेको थियो ।
३१ वर्षीय गुनतिलकलाई प्रहरीले आइतबार बिहान १ बजे नै सिड्नीको एक होटलबाट पक्राउ गरेको बताएको छ । पक्राउ गरी उनलाई सिड्नी सिटी प्रहरी स्टेसनमा लगिएको छ । प्रहरीकहाँ युवतीले सहमतिबिना नै जबर्जस्ती यौनसम्बन्ध राखेको आरोप लगाएकी थिइन् ।
यौन दुर्व्यवहारको आरोपमा दनुश्का पक्राउ परेको खबर श्रीलंका क्रिकेट टोलीले पनि पुष्टि गरेको छ । साथै उनी नोभेम्बर ७ मा अदालतमा उपस्थित हुने बताइएको छ । गुनाथिलका चोटका कारण टी–२० विश्वकपको पहिलो चरणबाट बाहिरिए पनि उनी टिमका खेलाडीहरूसँगै अष्ट्रेलियामा थिए ।
सन् २०१५ मा डेब्यु गरेका उनले श्रीलंकाका लागि ८ वटा टेस्ट, ४७ वटा एकदिवसीय अन्तर्राष्ट्रिय र ४६ वटा टी(२० अन्तर्राष्ट्रिय खेलेका छन् । शनिबार समूह चरणको अन्तिम खेलमा इंग्ल्याण्डसँग पराजित भएपछि श्रीलंका यसपटकको विश्वकप प्रतियोगिताबाट बाहिरिएको छ ।
