एडिलेड, २४ कात्तिक।
आइसीसी टि-ट्वान्टी विश्वकपको फाइनलमा इंग्ल्याण्ड र पाकिस्तानबीच प्रतिस्पर्धा हुने भएको छ । बिहीबार सम्पन्न दोस्रो सेमिफाइनल खेलमा भारतलाई १० विकेटले हराउँदै इंगल्याण्ड तेस्रो पटक टि-ट्वान्टी विश्वकपको फाइनल प्रवेश गरेको हो ।
भारतले दिएको १६९ रनको लक्ष्य इंग्ल्याण्डले कुनै पनि विकेट नगुमाई १६ ओभरमा भेट्टायो । उसका लागि ओपनरद्वय एलेक्स हेल्स र जोस बट्लर दुवै अविजित रहेेर क्रमश: ८६ र ८० रन बनाए । यी दुईले पहिलो विकेटका लागि कीर्तिमानी १७० नट आउट रनको साझेदारी गरे । उक्त रन टि-ट्वान्टी विश्वकपमा कुनै पनि विकेटका लागि भएको सर्वाधिक ठूलो साझेदारी बन्यो । हेल्स प्लेयर अफ दि म्याच रहे । भारतले ६ जना बलर प्रयोग गरेका कसैले पनि विकेट लिन सकेनन् ।
यसअघि हारेर पहिले ब्याटिङ गरेको भारतले निर्धारित २० ओभरमा ६ विकेटको क्षतिमा १६८ रनको योगफल खडा गरेको थियो । उसका विराट कोहलीले ५० र हार्दिक पाण्डेयले ६३ रन बनाए । बलिङमा इंग्ल्याण्डका तर्फबाट क्रिस जोर्डनले ३ तथा क्रिस वोक्स र अदिल रसिदले १-१ विकेट लिए ।
विश्वकपको फाइनल खेल आउँदो आइतबार खेलिने छ । पाकिस्तान र इंग्ल्याण्ड दुवैले यसअघि १-१ पटक टि-ट्वान्टी विश्वकप जितिसकेका छन् । पाकिस्तानले सन् २००९ को विश्वकप जितेको हो भने इंग्ल्याण्ड २०१० को च्याम्पियन हो ।
