भरतपुर, २६ पुस ।
सामान्य विवादले सुरु भएको घरासयी झगडाले चितवनमा एक दम्पतीको ज्यान गएको छ । श्रीमतीको हत्या गरेर श्रीमानले आत्महत्या गरेका छन् ।
भरतपुर महानगरपालिका वडा नम्बर २९ स्थित खेतबारीका २२ वर्षीय प्रेम बहादुर रानामगरले चौकोस प्रहार गरेर श्रीमती २१ वर्षीय बुद्धिमाया रानामगरको हत्या गरेका हुन् । श्रीमतीको हत्या गरेपछि रानाले आफ्नै घरको कोठाको बलोमा पासो लगाएर आत्महत्या गरेका हुन् ।
उनीहरूको चार वर्षको छोरा छन् । कामबाट फर्किएपछि उनीहरूबीच झगडा भएको स्थानीयको भनाइ छ । सोमबार साँझ साढे सात बजेतीर घटना भएपनि बिहान मात्रै थाहा भएको वडाध्यक्ष क्याप्टेन सूर्यबहादुर गुरुङले बताए ।
‘श्रीमतीलाई खाली शंका मात्रै गर्दा अघिपछी झगडा हुने गरेको रैछ,’ उनले भने, ‘हिजो श्रीमतीलाई चौकोसले हानेपछि आफु डोरी लगाएर झुण्डिएको हो । नजिकै घर नभएको कारण विहान मात्रै थाहा पाइयो, ’सामान्य घरायसी विवादले सुरु भएको झगडाले हत्याको रुप लिएको हो । पोष्टमार्टमका लागी शवलाई भरतपुर अस्पताल लगिएको छ ।
घर बाहिर आँगनमा रहेको अगेनाको छेउमा मृत अवस्थामा फेला परेको जिल्ला प्रहरी कार्यालयका प्रवक्ता डिएसपी विजय पण्डितले बताए । घटनाको थप अनुसन्धान भइरहेको उनले बताए ।
