प्रधानमन्त्री पुष्पकमल दाहाल प्रचण्डले संसदबाट विश्वासको मत पाएपछि हर्ष र गर्वको अनुभूति भएको प्रतिक्रिया दिनुभएको छ ।
मङ्गलवार प्रतिनिधि सभाबाट विश्वासको मत प्राप्त गरेपछि सञ्चारकर्मीलाई प्रतिक्रिया दिँदै प्रधानमन्त्री प्रचण्डले हर्ष र गर्वको अनुभूति भएको बताउनुभएको हो । उहाँले ठूलो जिम्मेवारी र चुनौती थपिएको महसुस गरेको पनि बताउनुभयो । आफूलाई प्रमुख प्रतिपक्षी दलले पनि विश्वासको मत दिनाले सरकारले गरेका प्रतिबद्धताहरू पूरा गर्न ऊर्जा प्राप्त भएको उहाँकाे भनाइ छ ।
सञ्चारकर्मीको प्रतिप्रश्नको जवाफ दिँदै प्रधानमन्त्री प्रचण्डले आफूलाई प्रमुख प्रतिपक्षी दल नेपाली कांग्रेसको विश्वासको मत प्राप्त हुनुले दुईतिर खुट्टा हालेको रूपमा चित्रण गर्नु नहुने बताउनुभयो । उहाँले भन्नुभयो, ‘हिजो तपाईँहरूले मलाई भोलि के हुन्छ विश्वासको मत भनेर साेध्नुभएकाे थियाे । मलाई सिङ्गै हाउसको समर्थन हुन्छ भनेको थिएँ । त्यो त मैले अनुमानको आधारमा भनेको थिएँ । आज त्यो यथार्थमा परिणत भएको छ । मलाई निकै हर्ष र गर्वको अनुभूति भएको छ । साथसाथै निकै ठूलो जिम्मेवारी र चुनौती थपिएको पनि महसुस गरेको छु । सदनबाट यो अपार विश्वास प्राप्त भएको छ । तपाईँहरूले भनेजस्तो त्यस्तो कुनै दुई वटा खुट्टा, तीन वटा खुट्टा होइन यो । यो एउटा जिम्मेवारीको कुरा हो ।’
प्रधानमन्त्री प्रचण्डले सरकारले गरेका प्रतिबद्धताअनुसार कामहरू अगाडि बढाउने विश्वास पनि दिलाउनुभयाे ।
