राष्ट्रिय स्वतन्त्र पार्टी (रास्वपा) का सभापति रवि लामिछानेले चितवन निर्वाचन क्षेत्र नम्बर २ को उपनिर्वाचनमा प्राप्त जितले जिम्मेवारी थपिएको बताएका छन् । आफूमा देखिएका कमजोरीलाई सुधार्दै अगाडि बढ्ने अवसर मिलेको पनि लामिछानेले बताएका छन् ।
चितवनमा मंगलबार सञ्चारकर्मीहरूलाई प्रतिक्रिया दिँदै लामिछानेले राजनीतिक यात्राका क्रममा अनुभवको कमीले गर्दा आफूबाट कमीकमजोरी हुन गएको बताएका हुन् ।
उनले आगामी दिनमा थप जिम्मेवार भएर अगाडि बढ्नुपर्ने आवश्यकता रहेको बताए । ‘राजनीतिक अभ्यास गरेर हामीले अझै परिपक्व हुनुपर्नेछ । कयौं अपरिपक्वताहरू देख्यौं । हामीले अरुका आलोचना गर्नेभन्दा पनि यो दौरानमा अनुभवका कमीले गर्दा कयौं कमीकमजोरी आफ्ना पनि देखेका छौं,’ उनले भने, ‘आफूमा देखिएका ती तमाम कमजोरीहरूलाई सुधार्दै अगाडि जाने एउटा अवसर मिलेको छ । थपिएर आएको यो मतले ठूलो सन्देश दिएको छ । थपिएको मत भनेको थपिएको जिम्मेवारी हो । थपिएको जिम्मेवारीमा हामी खरो उत्रिने छौं ।’
वैशाख १० मा भएको उपनिर्वाचनमा लामिछाले करिब ६९ भन्दा बढी प्रतिशत मतसहित विजयी भएका छन् । उनी ५४ हजार १७६ मतसहित विजयी भएका छन् । यहाँ कूल ७८ हजार २७७ मत खसेको थियो । उनका निकटतम प्रतिद्वन्द्वी कांग्रेसका जीतनारायण श्रेष्ठले ११ हजार २१४ मत ल्याएका छन् भने एमालेका रामप्रसाद न्यौपानेले १० हजार ९३६ मत प्राप्त गरे ।
