चितवन , माघ १३
चितवनका निजामती कर्मचारीले नागरिकप्रति सेवामैत्री ब्यवहारमा प्रतिबद्ध रहेको दाबी गरेका छन् ।सेवाग्राहीका लागि प्रभावकारी रुपमा लागेको बताउँदै खटिएका कर्मचारीको स्वाभिमान र आत्मसम्मान बढाउन पनि सरोकार पक्षको ध्यानाकर्षण गराएका छन । नेपाली काँग्रेसको शुभेच्छुक संस्था नेपाल निजामती कर्मचारी युनियन चितवनको अन्तरक्रिया तथा बनभोज कार्यक्रममा बोल्ने कर्मचारीले कहिलेकाही अनावश्यक दबाबले पनि मनोबल गिराउने गरेको भन्दै हस्तक्षेप नगर्न आग्रह गरे । युनियनको जिल्ला समितिले आँपटारीमा अन्तरक्रिया सहितको बनभोज कार्यक्रमको आयोजना गरेको थियो ।
युनियन सम्बद्ध कर्मचारीले नागरिकको सेवामा रचनात्मक तवरबाट सधैं प्रतिबद्ध भएर काम गरेको जनाएका छन । युनियनका जिल्ला अध्यक्ष बासुदेव सापकोटाले नयाँ र पुराना कर्मचारीको मित्रमिलन कार्यक्रम आयोजना गरेको बताए । प्रमुख अतिथि केन्द्रिय अध्यक्ष गोपाल पोखरेलले गुनासो र देखेसोलाई पर राखेर जनताप्रति उत्तरदायी रहन आग्रह गरे । कार्यक्रममा युनियनका जिल्ला सचिव रेणु घिमिरेले सहजीकरण गरेकी थिइन् । कार्यक्रममा वागमती प्रदेश सरकारका स्वास्थ्य मन्त्री उत्तम जोशीले जनताको बिश्वास पाउने गरि काम गर्न आग्रह गरे । भरतपुर महानगरपालिकाका उपप्रमुख चित्रसेन अधिकारीले आफू समन्वय र सहकार्यका लागि प्रतिबद्ध रहेको बताए । युनियनका जिल्ला उपाध्यक्ष सुभद्रा सुवेदी रेग्मीले स्वागत मन्तव्य व्यक्त गर्दै आफुहरु सधै नागरिकमैत्री सेवामा गम्भीर रहेको बताइन् ।
कार्यक्रममा जिल्ला स्थित ७ वटै पालिकाका कर्मचारीहरुको प्रतिनिधित्व गर्दै भरतपुर महानगरपालिकाका कर्मचारी बालकृष्ण थपलियाले स्थानीय तहमा देखिएका कर्मचारीहरुको समस्याको बारेमा आफ्नो धारणा राखेका थिए । उक्त कार्यक्रममा युनियनका पुर्व अध्यक्ष रवि तिमिल्सिना र पुर्व केन्द्रिय सदस्य तथा जिल्ला सल्लाहकार मनराज वस्तीलाई मरणोपरान्त सम्मान गरिएको थियो । विगत २ भित्रमा चितवनवाट सेवा निवृत्त हुनु भएका कर्मचारीहरुलाई सम्मान गरिएको थियो । भने गत वैसाख देखि चितवनमा सरुवा भई तथा नयाँ नियुक्ति लिई आउनु भएका कर्मचारीहरुलाई स्वागत गरिएको थियो ।
