चितवन, २१ माघ ।
पार्टीले भाषण सुनाउने तर गुनासो नसुन्ने परिपाटीबाट आजित बनेका काँग्रेसी कार्यकर्ता यो पटक दंग परे । यसअघि नेताले मञ्चमा बोल्ने अनि कार्यकर्ता तल बसेर ताली बजाउने चलन थियो ।
यसपटक त्यसो भएन । कार्यकर्ताले नेताकै अगाडि बसेर आफ्ना कुरा निर्धक्क राख्न पाए । पार्टीका नेताको भाषण सुनेनन् । बरु आफ्ना मनका कुरा पोखे । अरु बेला घण्टौँ कुरेर भाषण सुन्ने कार्यकर्ताले यसपटक आफ्नो कुरा नेतालाई सुनाए ।
पार्टीभित्रको आन्तरिक कलहले कार्यकर्तामा थुप्रिएको वितृष्णा र आक्रोश यस पटक उजागर भयो । महामन्त्री गगनकुमार थापासामु उनीहरूले मनभित्र गुम्सिएका पीडा पोखे । पार्टीमा भएको अन्तरघात र जनतासँग पूरा नगरिएका बाचाका बारेमा कार्यकर्ताले कड्किएर कुरा राखे ।
भरतपुर महानगरपालिका वडा नं २६ का वडा पार्टी सभापति पुरुषोत्तमकमल ढकालले पार्टीको नेतृत्व तहमा मिलाप गर्न आग्रह गरे । “हामी भुइँमा मरेर काम गर्छौं । केन्द्रमा नेताहरू झगडा गर्दै मरेर पार्टी सिध्याउन लागेका छन् । नेताहरू मिल्नु प¥यो,” उनले भने, “विकासका काममा सुस्ताउँदा जनतामाझ जान गाह्रो भएको छ । जनताले विश्वास गर्न लायकको बन्नुप¥यो । खाली गठबन्धन गरेर मात्रै अरुको भरमा कहिलेसमम चुनाव लड्ने ?”
नागरिक संवादका क्रममा महामन्त्री थापा कार्यकर्ताका कुरा सुनेर समस्या टिपोट गर्थे । पार्टीका गतिविधि र विकासे कामको विषयमा भएका समस्या सुनेर नोटमा टिप्थे । जनतासँग प्रत्यक्ष भेटेर उनले कार्यकर्तालाई नआत्तिन आग्रह पनि गरे ।
थापाले मनलाई शुद्ध बनाउन जिल्लाका सबै नेता र कार्यकर्तासँग आग्रह गरे । पार्टीभित्रको अन्तरद्वन्द्वले संगठन कमजोर बन्दै गएकोप्रति थापाले पनि सहमति व्यक्त गरे । तल्लो तहदेखिका सबै कार्यकर्ता र नेताले पार्टी जोगाउन सजग हुनुपर्ने राय उनले व्यक्त गरे ।
“हामी जमिनबाट उठ्दै–उठ्दै आएको दल हौ । तलैबाट जाऔं भनेर आएका हौ”, महामन्त्री थापाले भने, “सबैसँग संवाद भयो । सबैका कुरा सुन्यौं । यहाँ आएका गुनासोलाई महासमितिको बैठकमा पेश हुने दस्ताबेजमा लेख्न आधार हुन्छ ।”
संवाद यात्राको क्रममा कार्यकर्ताहरू गठबन्धनसँग सन्तुष्ट नरहेको देखिएको उनले बताए । “गठबन्धनलाई गलत नभनेको एउटा कार्यक्रम पनि भेटिएन”, उनले भने, “हामीले दस्तावेजमा के भन्न सक्छौं भने पार्टीको धारणा यो हो भनेर भन्न सक्छौं । पार्टीलाई जोडिएर आएका कुरालाई महासमितिमा लैजान सहज भएको छ ।”
महामन्त्री थापाले सरकारमा रहेको कारण पनि बजेट निर्माण र योजनाबारे पनि छलफल गरेका थिए । स्थानीय स्तरमा भएका विकास निर्माणका समस्याबारे पनि जानकारी लिएका थिए । “हामी सरकारमा छौं । अब हामीले बजेट बनाउँदै छौं”, महामन्त्री थापाले थपे, “नयाँ कुरा केही होइन । समस्या पुरानै हुन् । तर यसपटक काम गर्ने सोचका साथ जानकारी लिएर काठमाडौं फर्कदै छौं ।”
उनी हुलाकी राजमार्गको हुँदै पर्साको ठोरीबाट शनिबार चितवन आएका थिए । हुलाकी सडकखण्डको अवस्थाको अवलोकन गर्दै उनले माडी, जगतपुर, पटिहानी, गीतानगर, नारायणघाटमा कार्यकर्तासँग भेटघाट गरेका थिए ।
भरतपुरमा कार्यकर्तासँगको भेटघाटपछि उनी संसदको बैठकका लागि काठमाडौं फर्किएका छन् । संसद बैठक सकेपछि नारायणघाटबाट नवलपुर हुँदै यात्रा अघि बढाउने थापाले बताए ।
यात्राको क्रममा थापालाई स्थानीय समस्या, पूर्वाधारका समस्या, मिटरब्याजी, सहकारीको ठगी, लगायतका समस्याका बारे नागरिकले ध्यानाकर्षण गराएका थिए ।
“काठमाडौंमा बसेर सुनेको भन्दा कसरी ठगिएका छन् भन्ने प्रत्यक्ष पीडा सुन्न पायौं”, उनले भने, “संवाद यात्राले काँग्रेसको भावी योजना बनाउन ठूलो मद्दत पुग्छ भन्ने विश्वास लागेको छ ।”
काँग्रेस नेता प्रा.डा सूर्यकान्त घिमिरेले महामन्त्री थापाको अभियानले पार्टीलाई जनतामाझ पुग्न प्रभावकारी हुने बताए । “ग्रामीण भेगका नागरिकसँग प्रत्यक्ष सम्पर्क गर्दा संवादबाट कानूनी हिसाबले भएका अड्चन र विकास निर्माणमा भएका कमजोरीको विषयमा समस्या पत्ता लगाउन सजिलो हुन्छ”, घिमिरेले भने, “यसलाई राम्रोसँग सम्पन्न गर्न सकेको खण्डमा काँग्रेसमा थारै भएपनि रक्तसञ्चारको काम हुन्छ भन्ने लागेको छ ।”
चितवन बसाइमा थापाले नवलपरासी पूर्वका नेता र कार्यकर्तासँग पनि भेटघाट गरेका थिए । नागरिकसँगै कार्यकर्ताले गुनासो राखेको पार्टीका सचिव ध्र्रुव पोखरेलले बताए । “पार्टीका नेतासँगको प्रत्यक्ष भेटघाटले कार्यकर्तामा उत्साह भएको देखियो”, पोखरेलले भने । थापाले मंगलवार बुटवलबाट यात्रा सुचारु गर्ने पार्टीका महासमिति सदस्य राजकुमार राजभण्डारीले बताए ।
