चितवन , माघ २२ ।
गौतमबुद्ध अन्तर्राष्ट्रिय क्रिकेट रंगशाला निर्माण अघि बढाउन वागमती प्रदेश सरकारले चासो देखाएको छ । रंगशाला निर्माणका लागि प्रदेश सरकारले बजेट सुनिश्चित गर्ने भएको हो । वागमती प्रदेशका स्वास्थ्य मन्त्री उत्तम जोशीसँगै रंगशालाको स्थलगत निरीक्षण गरेपश्चात् आर्थिक मामिला मन्त्री बहादुर सिंह लामाले बजेट विनियोजन गर्ने प्रतिबद्धता जनाएका हुन् ।
उनका अनुसार प्रदेश सरकारले ७० प्रतिशत बजेट सहयोग गर्नेछ । अलपत्र परेको रंगशालाको निरीक्षण गरेपछि उनले निर्माण प्रक्रिया पूरा गर्न प्रदेश सरकार सकारात्मक रहेको बताए । उनले भरतपुर महानगरपालिकाकी प्रमुख रेनु दाहाललाई रंगशालामा बजेट पार्ने विश्वास पनि दिलाएका छन् ।
“देशकै गौरवको आयोजना (वाग्मती) प्रदेशमा छ । यसलाई पूरा गर्नु सबैको दायित्व हो”, लामाले भने, “रंगशाला निर्माणमा प्रदेश सरकारको चासो छ । हामी बजेट सुनिश्चितता गरेरै अघि बढ्छौ । ढुक्क हुनुस् ।”
स्वास्थ्य मन्त्री जोशीले रंगशाला निर्माणको लागि अर्थमन्त्रीलाई आग्रह गरेका थिए । गृह जिल्लामा भएको परियोजनाका लागि आफूले प्रदेश सरकारमा पहल गरेको मन्त्री जोशीले बताए ।
“रंगशाला निर्माणमा चासो मात्रै होइन सक्रियता पनि उत्तिकै छ । मुख्यमन्त्री नै यसमा सकारात्मक हुनुहुन्छ”, मन्त्री जोशीले भने, “यसपटक बजेटबाटै सम्बोधन हुने निश्चित छ ।”
महानगरपालिका प्रमुख रेनु दाहालले रंगशालाको भौतिक र आर्थिक अवस्थाबारे जानकारी गराएकी थिइन् । उनले बजेटको व्यवस्था भए अन्रर्राष्ट्रिय क्रिकेट रंगशाला निर्माणले गति लिने बताइन् ।
“समग्र मुलुकको गौरवको आयोजना बजेटकै कारण रोकिएको हो । यसलाई पूरा गर्न प्रदेश सरकारसँग हामीले ठूलो आशा गरेका छौं”, दाहालले भनिन्, “मन्त्रीज्यूबाट सकारात्मक आश्वासन पाएका छौं । आशा छ रंगशालामा प्रदेश सरकारले राम्रो निर्णय गर्नेछ ।”
उपप्रमुख चित्रसेन अधिकारीले पनि रंगशाला निर्माणमा पाएको आश्वासनले आशा जगाएको बताए । मन्त्री लामासँगै नेपाली काँग्रेसका केन्द्रीय सदस्य टेक प्रसाद गुरुङ, वाग्मती प्रदेश सभा सदस्य गीता गुरुङ र माया श्रेष्ठ, भरतपुर महानगरपालिका १५ का वडा अध्यक्ष श्रीकृष्ण देवकोटा पनि रंगशाला पुगेका थिए ।
