चितवन, २४ फागुन । शुक्रवारबाट भरतपुरमा सुरु हुने नेपाल फर्मा एक्स्पो २०२४ को सन्दर्भमा विहिवार औषधी जन्य क्षेत्रका जनशक्तिलाई लक्षित गरी अन्तरक्रिया र गोष्ठी गरिएको छ । फर्मा एक्स्पो अन्तर्गत औषधी उत्पादन क्षेत्रका प्राविधिक जनशक्तिको लागि भरतपुरको दियालो फूडल्याण्ड र चितवन मिड टाउन रिसोर्टमा बजार प्रतिनिधिको लागि अन्तरक्रिया गरिएको हो । औषधी उत्पादन क्षेत्रका प्राविधिक जनशक्तिलाई लागि पछिल्लो समय विश्वभर औषधी उत्पादन क्षेत्रमा भइरहेको मेसिन र प्रविधिको विकास बारेमा जानकारी गराइएको एपोनका गुणस्तर सर्कल संयोजक प्रशंसा श्रेष्ठका बताइन् ।
सो गोष्ठीमा देशभरबाट आएका विभिन्न औषधी कम्पनीका १५० जनाभन्दा बढी प्राविधिक जनशक्ति सहभागी थिए । त्यस्तै नेपाली सहित विदेशी सप्लायर्स र औषधी उत्पादक क्षेत्रका ब्यक्तिले पछिल्लो समयमा औषधी उत्पादनका क्षेत्रमा विकास भइरहेका प्रविधि र मेसिनबारे जानकारी गराएका थिए ।
त्यस्तै गोष्ठीमा विभिन्न कम्पनीका बजार प्रतिनिधिको क्षेत्रमा काम गर्ने जनशक्तिलाई संयुक्त रुपमा व्यवसायिक क्षमता अभिवृद्धिको लागि तालिम सहितको अन्तरक्रिया गरिएको एपोनका मार्केटिङ सर्कल संयोजक दिपेश प्रधानले बताए । देशभरबाट आएका ८० जना मेडिकल प्रतिनिधी र ३५ जना क्षेत्रीय म्यानेजर सहभागी थिए । औषधी क्षेत्रको बजार प्रतिनिधीहरुलाई नियमित रुपमा क्षमता अभिवृद्धिको कार्यक्रम गरिएपनि एक्स्पोको अवसरमा संयुक्त रुपमा गरिएको गोष्ठीले एकआपसको कम्पनीको भाइचारा वृद्धि हुने प्रधानले बताए ।
प्रविधि, ज्ञान र सीपको आदानप्रदानका लागी एक्सपोमा विभिन्न गोष्ठी, तालिम र अन्तरक्रिया कार्यक्रम हुने आयोजकले जनाएको छ । चितवन उद्योग संघको प्रर्दशनी केन्द्रमा हुन लागेको एक्स्पोको तयारी पुरा भएको छ । नेपाल औषधी उत्पादक संघको आयोजनामा एक्स्पो हुन लागेको हो ।
