चितवन– ६ वर्षिय बालक आरुष पौडेल अघिल्लो दिनमा आरुष यही कक्षा कोठामा पढ्दै थिए । स्कुल छुट्टी भएपछि साथीलाई बाई भनेर हिडेका आरुष साँझपख जीन्दगीलाई नै बाई गरेर गए । सोमवार त्यसी गएका आरुषलाई मंगलवार विहान उनका साथीहरुले नदेखेपछि खोज्दै थिए । संगै पढ्ने कुद्ने साथीहरु आरुषलाई पर्खेर बसेका थिए । जब कहिल्यै नफर्कने गरी गएको कुरा थाहा पाए उनीहरु केही स्तब्ध थिए । उनीहरुको भावले प्रष्ट बुझाउँथ्यो । विस्तारै थाहा पाए अनि भन्न थाले ‘ आरुष त भगवानको घरमा गए ’ । आज आरुष आएन भनेर कक्षाका शिक्षकलाई सोध्दै थिए ,’ आरुषकी शिक्षक बेबी रिजालले भनिन् , ‘ उनका साथीहरुले राम्ररी कुरा नबुझे पनि आरुष भगवानको घरमा गयो भने ।’
उसका साथीहरुले घरमा पुगेर आरुषकै कुरा गरिरहेका छन् । आरुष अब आउदैन रे भन्दै परिवारमा कुरा गरेको छन् । धेरै नबोलेपनि आफ्नो कक्षाको मिल्ने साथीको अभाव महसुस गरेका थिए । भावना ब्यक्त गर्न नजानेपनि उनीहरुको अनुहार मलिन मलिन थियो । केबल विद्यार्थी मात्र होई आरुषलाई चिनेका शिक्षकहरु जो हरेक दिन संगै हुन्थे उनीहरुलाई परिवारलाई जस्तै चोट परेको छ ।
आरुष पढ्नमा तेजीलो अनि अन्य कुरामा फुर्तिलो थिए । पाँच वर्ष दश महिना पुगेका थिए । दुर्घटना हुने दिन आरुषले म्यामलाई म नाच्छु भन्दै थिए । उनको पालो भोलिपल्ट भनिएको थियो । तर उनी कहिल्यै ननाच्ने गरी गए । ‘ जाने बेला म्याम म पनि नाच्छु नि , ’ शिक्षक रिजालले आरुषको कुरा स्मरण गर्दै भनिन् , ‘ अन्तिम दिन रहेछ । कहिल्यै नाच्छु नभनेको बालकले आफै नाच्छु भन्दै आएका रहेछन्। ’
सडकमा बग्गी सहित आएको घोडालाई हेर्न सडकमा पुगेका आरुषलाई बसले ठक्कर दिएको हो । ६ वर्षको बच्चा घर छेवैमा चालकको लापरबाहीले ज्यान भयो । भरतपुरको वाल्मीकि वोर्डिङमा मंगलवारदेखी सन्नाटा छाएको छ । आरुष कक्षा केजीमा पढ्थे । ‘ आफ्नो सन्तान झै माया गरेको बच्चाको निधनको खबर पत्याउन पनि सकेकोछैन । बाबुको अनुहार आँखामा झल्झली छ ,’ रसाएका आँखा पुच्दै शिक्षक रिजालले भनिन् , ‘ कक्षा सुनसान छ । सुरुमा त छिर्ने आँट नै आएन । उ चलेको हिडेको मात्रै यादले सताएको छ । ’
वाल्मिकीको प्रि प्राइमरी ब्लकमा कसैको आँखा ओभानो छैन । ‘ सबैको आँखामा आरुष खेलेको , हिडेको झल्को आइरहेको छ , ’ प्राइमरी तहकी इन्चार्ज विष्णु कंडेलले भनिन् , ‘ आकाशको ताराजस्तै थियो त्यो बाबु । लाखौं तारा थिए । त्यहीमध्येको विलाएर गयो भनेर मनले नमानेपनि चित्त बुझाउन परेको छ । ’ एउटा चालकको लापरवाहीले एउटा असर साथी , आमाको ममता खोसिएको छ अनि बुवाको सहारा खोसिएको ’ शिक्ष्क कंडेलले भनिन् ।
गत सोमवार साँझ पौने आठ बजे भरतपुर माच्छापुच्छ्रे चोक नजिक दुर्घटना भएको हो । भरतपुरबाट माडि तर्फ जादै गरेको ना ४ ख ५८१५ नं.को बस मापसे गरेर तिब्र गतिमा हाँकेको बसले ठक्कर दिदा घटनास्थलमा मृत्यु भएको हो । बस र चालक माडी नगरपालिका ८ बस्ने ४१ वर्षिय बिकास सार्कीलाई जिल्ला प्रहरी कार्यालय चितवनमा राखिएको छ ।

शुक्रबार, फागुन २५, २०८० मा प्रकाशित

तपाईको प्रतिक्रिया

सम्बन्धित समाचार

कर्फ्यु र निषेधाज्ञा हटेपछि सामान्यतर्फ उन्मुख चितवन

सैनिक मुख्यालय बाहिर सरकारको नेतृत्वको विषयमा विवाद

सरकारको नेतृत्वमा  सुशिला कार्कीलाई अघि बढाउने प्रस्तावमा विवाद सुरु