गोरखा : उत्तरी गोरखामा स्थापित बोर्डर आउटपोस्ट (बिओपी)को टोली र चिनियाँ सुरक्षाकर्मीको टोलीले पहिलो पटक संयुक्त सुरक्षागस्ती गरेको छ।चुमनुब्री गाउँपालिका-१ को साम्दोमा स्थापित बिओपीमा खटिएका सशस्त्र प्रहरीको टोली र चिनियाँ प्रहरी टोलीले शुक्रबार पहिलो पटक संयुक्त गस्ती गरेको सशस्त्र प्रहरीको गोरखास्थित कार्यालय प्रमुख सुमन बोगटीले जानकारी दिए। दुवैतर्फका सीमा सुरक्षा प्रहरीका इञ्चार्ज इन्स्पेक्टर नेतृत्वको टोलीले संयुक्त गस्ती गरेको उनले बताए।
उनीहरूले रुइला भञ्ज्याङस्थित ३५ नम्बर सीमास्तम्भ आसपास गस्ती गरेका हु । रुइलाभञ्ज्याङ दुई देश बीच आवतजावत गर्ने मौसमी नाका हो। सो नाका विगत पाँच वर्षदेखि बन्द अवस्थामा छ।
गस्तीका क्रममा दुवैतर्फका सुरक्षाकर्मीका बीच अनौपचारिक छलफल कार्यक्रम पनि भएको थियो। कार्यक्रममा सीमा क्षेत्रमा अवाञ्छित गतिविधि गर्न पूर्णरूपमा निषेध गर्ने समझदारी बनेको डीएसपी सुमन बोगटीले जानकारी दिए। सीमा सुरक्षाका लागि सरकारले यही जेठको १३ गते साम्दोमा बिओपी स्थापना गरेको थियो।
