भरतपुर । आठौँ राष्ट्रिय रनिङ शिल्ड दोहोरी गीत प्रतियोगिता भरतपुरमा हुने भएको छ । राष्ट्रिय लोक तथा दोहोरी गीत प्रतिष्ठान नेपालको आयोजनामा फागुन १७ गतेदेखि २० गतेसम्म उक्त प्रतियोगिता हुने भएको हो ।
भरतपुर–१० स्थित वीरेन्द्र बहुमुखी क्याम्पसको डिग्री भवनको खेल मैदानमा प्रतियोगिता गरिने आयोजकले शनिबार पत्रकार सम्मेलनको आयोजना गरी जानकारी गराएको हो ।
प्रतियोगितामा २४ प्रतियोगीले सहभागिता जनाउने राष्ट्रिय लोक तथा दोहोरी गीत प्रतिष्ठान नेपालकी अध्यक्ष रीता थापा मगरले बताइन् । प्रथम पुरस्कार तीन लाख, द्वितीय पुरस्कार दुई लाख, तृतीय पुरस्कार एक लाख र सान्त्वना पुरस्कार ५० हजार रूपैयाँ रहेको उनले बताइन् । प्रतियोगी कलाकारहरुमध्येबाट उत्कृष्ट गायक, उत्कृष्ट गायिका, उत्कृष्ट भेषभूषा, उत्कृष्ट नवगायक र उत्कृष्ट नवगायिकालाई आकर्षक पुरस्कारको व्यवस्था गरिएको उनले जानकारी दिइन् ।
प्रतियोगिताको प्रमुख प्रवद्र्धकमा भरतपुर महानगरपालिका रहने भएको छ । पूर्वेली र पश्चिमेली भाकाहरुको सङ्गमस्थलका रुपमा रहेको चितवनमा पहिलोपटक यस किसिमको प्रतियोगिता गर्न लागिएको हो । ‘प्रतियोगितामा नयाँ वा पुराना सबै कलाकार सहभागी हुन सक्नुहुन्छ । इच्छुकहरुलाई पहिलो चरणमा प्रदेश तहमै प्रतिस्पर्धा गराएर २४ प्रतियोगीलाई मात्रै अन्तिम चरणमा सहभागी गराइन्छ’, उनले भनिन् ।
प्रतियोगितामा दुईवटा अर्थ लगाउने शब्दहरु उच्चारण नै नहुने उनले दाबी गरिन् । ‘प्रतिष्ठानको उद्देश्य लोकसंस्कृतिको जगेर्ना गर्ने र कुनाकन्दरामा लुकेर रहेका प्रतिभा र संस्कृतिको उजागर गर्ने हो’, उनले भनिन् । प्रतिष्ठानमा करिब ३० हजार कलाकारहरु सदस्य रहेको बताइएको छ ।
