अहिले घर, बगैंचा र कोठामा लक्की बेम्बो सजाउने प्रचलन बढेको छ । यसले कोठाको सौन्दर्य त बढाउँछ नै, घरमा सुख र समृद्धि भित्र्याउने विश्वास समेत गरिन्छ ।
लक्की बेम्बोलाई पानीमा मात्र र माटो दुवैमा रोप्न सकिन्छ । शुद्ध पानी मात्र राखेर भासमा यसलाई रोप्न सकिन्छ । साथै कोकोपिड, माटो र कम्पोस्ट मल मिसाएर गमला तथा बगैंचामा यसलाई रोप्न सकिने जय किसान नर्सरीका सञ्चालक दिलीप बादे बताउँछन् ।
कसरी रोप्ने ?
घरभित्र टेबलमा सजाएर राख्ने हो भने पानीमा रोप्न सकिन्छ । यसो गर्दा बिरुवा राम्ररी झाँगिंदैन । बिरुवालाई अलि धेरै झाँग बनाउने हो भने माटोमा रोप्न सकिन्छ ।
यसको बिरुवा नेपालमा पाइँदैन बाहिर देशबाट ल्याइएको हो । यो राम्ररी हुक्री सकेपछि कटिङबाट यसलाई सार्न सकिन्छ ।
हुन त यो धेरै प्रजातिको हुन्छ । तर चार प्रजातिको नेपालमा आउँछ । ‘स्पाइनल लक्की बेम्बो’माथि घुमेको, एउटा होचो बन्चमा आउँछ, एउटा प्रजाति एउटा-एउटा बोटमा आउँछ र अर्को मोटो ढाड र पातलो डाँठ भएको लक्की बेम्बो । यसको आकार र साइज भने फरक हुन्छ ।
कस्तो भास वा गमला चाहिन्छ ?
सानो आकारको लक्की बेम्बोको लागि कचौरा आकारको भास राम्रो हुन्छ । अग्लो छ भने सुरिलो आकारको भास चाहिन्छ । माटोमा रोप्ने हो भने ४-५ इन्चदेखि ७-८ इन्चको गमलामा रोप्न सकिन्छ ।
यसलाई माटोमा लगाइयो भने आठ फिटसम्म अग्लो पनि हुन सक्छ । टेबलमा राख्नको लागि भासमा राख्दा भने यसलाई कटिङ गरिरहनुपर्छ ।
घरको कुन दिशा वा कस्तो ठाउँमा राख्नु उचित ?
भासमा राखिएको लक्की बेम्बोलाई वास्तु भन्दा पनि काम गर्ने टेबलमा राख्ने गरिन्छ । गमलामा रोप्ने हो भने त इच्छा अनुसार जहाँ पनि राख्न सकियो । सिधा घाम नपर्ने ठाउँमा यसलाई राख्नुपर्छ ।
पानी कि माटोमा राख्नु राम्रो ?
पानीमा राख्दा यो आकर्षक देखिन्छ तर यसलाई माटोमा रोप्नु राम्रो हो । पानीमा रोप्दा एकदेखि दुई वर्षमा यो मर्छ तर माटोमा रोप्दा लामो समयसम्म बाँच्छ ।
लक्की बेम्बोलाई माटोमा रोपिएको छ भने महिनामा एकपटक कम्पोस्ट मल हाल्नुपर्छ । जाडो महिनामा १५ दिनमा एकपटक मात्र पानी हाले पुग्छ भने गर्मीमा हप्तामा एकपटक पानी हाल्नुपर्छ । भासमा राखिएको छ भने हप्तामा एकपटक पानी फेर्नुपर्छ ।
बिरुवाको मूल्य कति, डिजाइन कस्तो ?
लक्की बेम्बोको बिरुवाको मूल्य एउटा बोटको १०० रुपैयाँदेखि बन्चमा किन्दा १२ सय रुपैयाँसम्म पर्छ । लक्की बेम्बोलाई आकर्षक डिजाइनमा तयार गर्न धेरै बोट राखेर ठूलो बन्च बनाउनुपर्छ । यसलाई आकर्षक बनाउन रंगीन धागो रिबनले बाँध्न सकिन्छ ।
कसरी स्याहारसुसार गर्ने ?
– लक्की बेम्बोलाई पानीमा राख्ने हो भने पानीलाई फोहोर हुन दिनुहुँदैन । पानी फोहोर भयो भने डाँठहरू कुहिन्छ ।
– एक-एक हप्तामा पानी फेर्नुपर्छ । टेबलको पानी राख्नु हुन्न खानेपानी राख्नुपर्छ ।
– त्यसको पातमा र डाँठमा धुलो लागेको छ भनेको बेलाबेलामा पुछ्नुपर्छ । पुछ्दा भिजेको नरम कपडाले पुछ्नुपर्छ ।
– सिधा घाम नपर्ने तर उज्यालो ठाउँमा यसलाई राख्नुपर्छ ।
