क्रिकइन्फो, ५ कात्तिक ।
अष्ट्रेलियामा जारी टि-ट्वान्टी विश्वकप अन्तर्गत सुपर १२ को शनिबार खेलिएको खेलमा इंगल्याण्डले अफगानिस्तानलाई ५ विकेटले हराएको छ । फास्ट बलर साम कुरानले एक्लैले पाँच विकेट लिएपछि इंगल्णण्डले सहज जीत निकालेको हो ।
अफगानिस्तानले दिएको ११३ रनको सामान्य लक्ष्य इंगल्याण्डले खेल सकिन ११ बल बाँकी छँदा ५ विकेट गुमाएर भेट्टायो । उसका लागि लियाम लिभिङस्टोनले नट आउट २९ रनको योगदान दिए । अफगानिस्तानका फजहल फारुकी, मुजिब अर रहमान, रसिद खान, फरिद अहमद र मोहम्मद नबीले १-१ विकेट हात पारे ।
यसअघि पर्थमा टस हारेर पहिले ब्याटिङको निम्ता पाएको अफगानिस्तान इंगल्याण्डको धारिलो बलिङसामु टिक्न सकेन । अफगानिस्तानले १९.४ ओभरमा सबै विकेट गुमाएर ११२ रन मात्रै जोड्न सक्यो । उसका लागि इब्राहिम जदरानले ३२ तथा उसमान गानीले ३० रनको योगदान दिए । बलिङतर्फ ३.४ ओभरको स्पेल गरेका इंगल्याण्डका कुरानले जम्मा १० रन खर्चिएर ५ विकेट लिए । सो क्रममा उनी इंग्ल्यान्डका लागि टि-ट्वान्टी अन्तर्राष्ट्रियको एउटा पारीमा पाँच विकेट लिने पहिलो बलर बने । कुरानका अलावा मार्क उड र बेन स्टोक्सले २-२ तथा क्रिस वोक्सले १ विकेट लिए ।
जीतपछि इंगल्याण्डले २ अंक बटुलेको छ । सुपर १२ मा समूह १ मा रहेको ऊ अंकतालिकामा दोस्रो स्थानमा छ । समान २ अंक पाएको न्यूजील्याण्ड नेट रन रेटका आधारमा इंगल्याण्डभन्दा एक स्थान माथि रहेको छ ।
