१२ पुस, काठमाडौं ।
मिडसिजन ब्रेकपछि फेरी सुरु भएको प्रिमियर लिगमा आर्सनलले वेष्टहममाथि पुनरागमन जित निकाल्दै शीर्ष स्थानमा अग्रता फराकिलो बनाएको छ ।सोमबार राति भएको खेलमा आर्सनलले एक गोलले पछि परेको स्थिति उल्टाउँदै वेष्टहमलाई ३–१ ले पराजित गरेको हो ।
साइद बेनराहमाले २७औं मिनेटमा पेनाल्टीमा गोल गर्दै वेष्टहमलाई अग्रता दिलाएका थिए । तर दोस्रो हाफमा आर्सनलले पुनरागमन गर्यो । ५३ औं मिनेटमा बुकायो साकाले आर्सनललाका लागि बराबरी गोल फर्काए ।
त्यसको पाँच मिनेटपछि नै गाब्रिएल मार्टिनेलीले गोल गर्दै आर्सनललाई अग्रता दिलाएका थिए । आर्सनलका लागि एडवार्ड एनकेतिहले ६९औं मिनेटमा तेस्रो गोल गरे ।
जितपछि आर्सनलले १५ खेलबाट ४० अंक जोडेको छ र दोस्रो स्थानको न्युकासल युनाइटेडमाथि ७ अंकको अग्रता बनाएको छ ।
सोमबारै भएको खेलमा लेस्टर सिटीलाई ३–० ले पराजित गर्दै न्युकासल दोस्रो स्थानमा उक्लेको हो । न्युकासलको १६ खेलबाट ३३ अंक छ । न्युकासलका लागि क्रिस उड, मिगुएल अल्मिरोन र जोएलिन्टोनले गोल गरे ।
लिभरपुलले एस्टन भिल्लालाई ३–१ ले हरायो
यसैगरी लिभरपुलले एस्टन भिल्लालाई ३–१ ले पराजित गरेको छ । भिल्लाको मैदानमा भएको खेलमा लिभरपुलका लागि मोहमद सलाहले पाँचौ, भर्जिल भान डायकले ३७औं र स्टेफान बासेटिकले ८१औं मिनेटमा गोल गरे । भिल्लाका लागि ओली वाट्किन्सले ५९औं मिनेटमा गोल गरे । जितपछि १५ खेलबाट २५ अंक जोड्दै लिभरपुल छैटौं स्थानमा उक्लेको छ ।
लिगकै अन्य खेलमा ब्राइटनले साउथह्याम्पटनलाई ३–१ तथा फुलहमले क्रिस्टल प्यालेसलाई ३–० ले पराजित गरेको छ । टोटनहम हट्सपर र ब्रेन्टफोर्डले २–२ को बराबरी खेलेका छन् ।
