भरतपुर, २० कात्तिक ।
आइसीसी टि-ट्वान्टी विश्वकप अन्तर्गत सुपर १२ को आफ्नो अन्तिम खेलमा दक्षिण अफ्रिकाले नेदरल्याण्ड्सको हातबाट लज्जास्पद हार बेहोरेको छ । आइतबार सम्पन्न खेलमा नेदरल्याण्ड्सले अफ्रिकी टोलीलाई १३ रनले हराएको हो ।
नेदरल्याण्ड्सले दिएको १५९ रनको सामान्य लक्ष्य पछ्याउने क्रममा अफ्रिकी टोलीले निर्धारित २० ओभरमा ८ विकेट गुमाएर १४५ रन मात्र बनाउन सक्यो । जारी प्रतियोगितामा दमदार लयमा देखिएका अफ्रिकी ब्याट्सम्यानद्वय क्विनटन डि कक र रिली रुसोले नेदरल्याण्ड्स विरुद्ध सोचेअनुसारको सुरुवात दिलाउन सकेनन् ।
डि कक १३ रनमा आउट हुँदा रुसो २५ रनको स्कोरमा पेभिलियन फर्किए । कप्तान टेम्बा बाभुमाले २० रन जोड्दा हेनरिच क्लासनले २१ रन मात्र बनाउन सके । बलिङमा भने डच टोलीका ब्रान्डन ग्लोभरले सर्वाधिक ३ विकेट चट्काए । त्यस्तै फ्रेड क्लासन र बास डि लिडले २-२ तथा पाउल भान मिकिरनले १ विकेट लिए ।
यसअघि अडिलेड ओभलमा टस हारेर ब्याटिङको निम्तो पाएको नेदरल्याण्ड्सले २० ओभरमा ४ विकेट गुमाएर १५८ रनको स्कोर खडा गरेको थियो । उसका लागि प्लेयर अफ दि म्याच घोषित भएका कोलिन एकरमानले ४१ रनको अविजित पारी खेले । त्यस्तै टम कुपरको ३५ तथा स्टेफन माइबर्गको ३७ रनको पारीले नेदरल्याण्ड्सलाई बलियो सुरुवात दिएको थियो ।
२९ रनको व्यक्तिगत स्कोरमा आउट भएका म्याक्स ओ डाउडले अर्का ओपनर माइबर्गसँग पहिलो विकेटका लागि ५८ रनको साझेदारी गरे । बलिङमा भने दक्षिण अफ्रिकाका केशव महाराजले २ तथा एनरिच नोकिया र एडिएन माकरमले १-१ विकेट लिए ।
हारपछि दक्षिण अफ्रिकाको सेमिफाइनल यात्रा कठिन मोडमा पुगेको छ । दक्षिण अफ्रिकाको हारपछि सुपर १२ को समूह २ बाट भारतले सेमिफाइनल खेल्ने निश्चित भएको छ ।
५ खेलबाट ५ अंक मात्र जोडेको दक्षिण अफ्रिकाको सेमिफाइनल पुग्ने सम्भावना पाकिस्तानले बंगलादेश विरुद्ध गर्ने प्रदर्शनमा टिकेको छ । पाकिस्तान बंगलादेशसँग पराजित भए दक्षिण अफ्रिका अन्तिम ४ मा पुग्नेछ भने विपरीत नतिजा आएमा पाकिस्तान सेमिफाइनल प्रवेश गर्नेछ ।
