शुक्रबारदेखि नेपाली फिल्म डिसेम्बर फल्सले प्रदर्शन सुरु गरेको छ। प्रवीन झाको निर्देशन तथा आर्यन सिग्देल र उपासना सिंह ठकुरीको मुख्य भूमिका रहेको फिल्मले एकल प्रदर्शन थालेको हो।
एक्सन, लभ स्टोरी, ड्रामा जनरामा बनेको फिल्मले मल्टिप्लेक्समा २० देखि ४५ प्रतिशत सम्मको सो पाएको छ। भने दर्शकको उपस्थिति भने औसत मात्रै देखिएको छ। पहिलो दिनको बिहानका अधिकांश सोमा ३० प्रतिशतभन्दा कम अकुपेन्सी देखिएकोमा साँझका सोमा भने केही सुधार हुने देखिएको छ।
डिसेम्बर फल्सको लागि सबैभन्दा ठूलो चुनौतीको रूपमा दुई हप्ताअघि प्रदर्शनमा आएको हलिउड फिल्म अवतार : द वे अफ वाटर देखिएको छ। सबैजसो हलमा ५० प्रतिशतभन्दा बढी सो पाएको फिल्ममा दर्शकको चाप पनि सबैभन्दा धेरै छ। जेम्स क्यामरुनको लेखन तथा निर्देशन रहेको फिल्म सन् २००० मा पदर्शन भएको अवतारको सिक्वेल हो।
अवतार विश्व सिनेमाको इतिहासमा सर्वाधिक कमाइ गर्ने फिल्म पनि हो। यसको सिक्वेलले पनि दुई हप्तामा १ विलियन डलरमाथिको कमाइ गरिसकेको छ।
त्यस्तै, शुक्रबारदेखि बलिउड फिल्म सर्कस दोस्रो हप्तामा प्रवेश गरेको छ। रोहित सेट्टिको निर्देशनमा बनेको पिरियड कमेडी फिल्मले पनि बक्स अफिसमा खासै राम्रो प्रदर्शन गर्न सकेको छैन। १ सय ५० करोड भारुमा बनेको फिल्मले एक हप्तामा ४२ करोड आसपासको कमाइ गरेको छ।
