बलिउड सुपरस्टार आमिर खानले केही वर्षअघि एक अन्तर्वार्तामा भनेका थिए, ‘सलमान खानले सर्टको पछाडि चस्मा झुन्ड्याएको भरमा उनको फिल्मले सय करोड कमाउँछ । स्टारडम भनेको त्यो हो ।’ हुन पनि सलमानको स्टारडमले कमजोर फिल्मलाई पनि डिजास्टर हुन दिँदैन । उनको नामैले फिल्म चल्छ । यसैले भन्ने गरिन्छ, ‘फिल्म कि सलमान भरोसाले चल्छ कि भगवान् भरोसाले ।’
‘सुल्तान’पछि सलमानको फिल्म बलियो निस्किन सकेका छैनन् । तर पनि उनका फिल्मले बलिउडमा सफलताको मानक मानिने सय करोडको आँकडा छुने गरेका छन् । यसमा उनको नयाँ फिल्म ‘किसीका भाई किसीकी जान’ पनि थपिएको छ । सलमानको करिअरकै कमजोर फिल्मको रुपमा टिप्पणी गरिएको यो फिल्मले प्रदर्शनको १० दिनमा सय करोड कमाउन सफल भएको हो ।
१५ करोडको औसत ओपनिङ गरेको फिल्मले प्रदर्शनको दोस्रो र तेस्रो दिन कमाईमा उछाल ल्याएको थियो । दुई दिनमा फिल्मले ५२ करोड छाप्यो । त्यसपछि भने फिल्मको कमाईमा भारी गिरावट आउन थाल्यो । ‘वर्ड अफ माउथ’ बलियो नहुँदा विकेन्डपछि कमाईमा निकै कमजोर बनेको फिल्मले कछुवाको गतिमा आइतबारको कमाईबाट सय करोड क्लबमा आफ्नो नाम लेखाएको छ ।
योसहित सलमानको १६ वटा फिल्मले सय करोड कमाएका छन् । यसअघि उनका ‘टाइगर जिन्दा हे’, ‘सुल्तान’, ‘किक’, ‘बजरंगी भाइजान’, ‘भारत’, ‘प्रेम रतन धन पायो’, ‘एक था टाइगर’, ‘रेस ३’, ‘दबंग २’, ‘बडिगार्ड’, ‘दबंग ३’, ‘दबंग’, ‘रेडी’, ‘ट्यूबलाइट’ र ‘जय हो’ले सय करोड कमाएका थिए । र, बलिउडमा सबैभन्दा बढी सय करोडवाला फिल्म दिने एक्ला अभिनेता सलमान बनेका छन् ।
